شَعْبٌ بِمَا كَفِل لَهُ الدُّسْتُورُ .. يَتَحَلْطَمُ

تغطية عيد ميلاد دستور دولة الكويت

11-11-2009

دَامَ ظِلَّكَ وارِفَاً يَا دِسْتُورَنَا

وَرَحِمَكَ الله يَا عَبْدَ الله السَّالِمُ

تَرَكْتَ فِينَا مَا سَنَدَ لَنَا ظُهُورَنَا

فَنَحْنُ شَعْبٌ كَفِلَ الدُّسْتُورُ لَهُ أَنْ يَتَحَلْطَمُ

مجلسنا الموقر شهد التجمع في ساحة الإرادة

والحمدلله نوائب الدهر ماكانوا متواجدين

ولاّ كان صراخهم غطى على صوتنا

لو مهما سوينا كنا بنوصل متأخرين نظراً للتوقيت السيئ

اللي مادري منو مختاره بالظلمه

يعني شفيها لو كان التجمع الساعة 4 عصراً

تراه ما يوافق لا صلاة السنافر ولا الشناكل

الله يهديكم بس لو تجيكون على المواعيد

في بوابة الكويت الالكترونية

بدال ماهي محد داري عنها

ناس نفس التوقيت اللي بتلقونه

والثانيين بعدهم بربع ساعه

ترى الدستور كفل حرية كل شي

إي اقتضى التنويه

سامحوني على التصوير الغير واضح
مابي تحلطم على الصور ترى زين مني

يعني أروح أدش بويوههم

مقعدينا بعييييييييييييد

والصوت يالله نسمعه

عن نفسي ما سمعت غير اللي قال

خلني أستغل المايك دام انه معاي

وين زوجتي خل ترفع إيدها بشوفها

LOL






طبعاً الحق يقال

وفروا مشكورين أنشطه حلوه للأطفال

من تلوين الوجوه ورسم لوحات

ومشاركتهم باللوحات التذكارية

أترككم مع الصور

.
وطبعاً لقيت حبي المفقود هناك

تبارك الرحمن

إنت عوار قلب

واللي حلو إن حبنا مو من طرف واحد

بادلني الشعور

وشعر البنات بعد

ههههه

ومن اللي التقطتهم عدسة كاميرتي المحطوطه على الأوتو

الدكتورين الأحمدين

الدكتور أحمد الخطيب متجولاً

.

والدكتور أحمد البغدادي متأملاً
.

بعدها نادونا لورشة عمل إعرف دستورك

الله يهداها تقولنا اللي مسكت المايك

تفضلوا معانا بالورشه

يالله حياكم الله

يالله في الحركة بركة

كان ودي آخذ المايك أقولها

عيزانــــــــيـــــــن

هههههه

بصراحة ما قدرت أعرف شعلاقة إسم الورشة باللي صار

ما أنسى أشكرهم على الدستور المصغر باللغتين العربية والانجليشية

بدأ عريف الورشة بإلقاء كلمه

وبعدها خلصت بطارية الكاميرا

وما صورت المبدع

الشاعر حسين العندليب

ماشاالله عليك

أبدعت وكنت أكثر ما تفاعل معه الحضور

وفي خضم الأحداث

صورت الشرطة يقزون بين الحضور

ويحفظون الأمن مستتباً مشكورين

ويمنعونا من المواقف القريبه

لأن شعارهم كان أيضاً في الحركة بركه

عاد محسوبتكم ما قصرت صفطت آخر موقف

.
وتأبى المروءة إلا أن تصور شي ماله داعي تماماً

امتداد طولي يذكرني بأريل الموبايل

أول ما اخترعوا الموبايل الطابوقه

شرايكم نبيعه؟؟

ونشتري بداله مدير حملة اوباما

يمكن يعدل أوضاعنا

يا صوت الكويت

يعطيكم ألف عافية

متطوعين تعبتوا نفسكم

والدستور يستاهل وقفتنا ووقفتكم

وآزرنا دستورنا بيومه

بس ما تشوفون إن التنظيم يشبه

تنظيمي لفعاليات سنة أولى جامعه
والإعلان عنه محدود
والمشاركة متواضعه
لوما المدونات كان بس المنظمين شاركوا

تقبلوا انتقادي بصدر رحب

لأني ودي أشوف 11-11-2009 أفضل
ويكون يوم الدستور

يليق بأثر الدستور على الكويت
خلال أكثر من أربعين عام

على طاري المدونين

كنت بصور كل الحضور

وأحطهم لكم

وكل واحد يقول صورته موجوده ولا لأ

بدون لا يقولنا منو منو

بس خفت يغتالوني بعض الناس

هههههه
ولاحترام الخصوصيه والدستور

اللي شفتهم وما سلمت عليهم

ترى ما عرفتكم

ولا عرفتوني

الحمدلله محد يشره علي

ينيونه

استمتعت بصحبتج إنتي ويانج وأسرتكم الجميله

عسى الله يسعدكم ويديمكم لبعض

ولا يحرمني منكم

ما خليتوني بروحي

ويبتولي بريد لووول

والله الانترنت يسوي ربع هههه

حبيت البلوقر خلاص

.

.

.

ختام الاحتفالية كان في عرضه جميله

شارك فيها عدد من الحضور

أفرحتنا كثيراً

وأنني أطالب من لابتوبي هذا

أنه بما أن الدستور قد نص على

سواسيه أفراد الشعب

فبليز السنة اليايه

نبي عرضه وهبان

وإلى فعاليات أخرى بإذن الله