بِحبـّاتِ العـقيـقِ عَلى جـيـدي

صارلي فترة ما تمشيت بين المدونات

مع إني تعودت أقرا للكل ما أحب أقطع

وبما أني ملولة وأحب التغيير

فالقراءة من المدونين والمدونات من سنين ماي فيفوريت

أمس كنت مستانسة آز يوجوال

أعلق على مدونة أروح للثانية وأعلق ومنها للي بعدها

وصلت لمدونة شاي الضحى

أول مرة أمر عليها

ولا الزين ونجمة وجارة القمر فاتحينها

قلت عدل وناسة سوالف بنات ودمهم خفيف

دشيت أقرا ولا تصكني صورة ذااااك البريعصي اللي يخز

يالزين ليش جذي وين جاي الضحى مع الهيل وين الدرابيل

وين الرهش والسوالف الحلوة وريحة الطيب

حرام عليج جد مو انتي ما تدرين شسويتي فيني

والله انا لي قصة سيئة جدا مع البريعصي الابيض

حسبي الله عليه وين ما كان

لازم تعرفونها مع إنها مو سالفة عيد

بس أبيكم تحسون باللي حسيته يوم شفت ويهه بالبوست

شوفوا يا محفوظين السلامة

في بيتنا القديم كنت ماخذه غرفة تحت محد يستخدمها ومسويتها مكتب

اقعد أقرا واطقطق على لابتوبي

ليلة السالفة راحت على نومة بالمكتب وثاني يوم الأحد دوام

وآنا وقتها أشتغل ببنك يعني قبل 7.30 لازم أكون هناك

صحاني منبه الموبايل على اذان الفجر

قمت صليت وقلت آخذ شاور

عزكم الله الحمام فوق يم غرفة امي

فخفت اقعدها قلت اخذ شاور بحمام الحوش

والدنيا بررررررررررررررررررررررد

طلعت مستانسة درجة الحرارة مو اكثر من 3

والدنيا ظلمة بالحوش وصوت الهوا مع النخل والشجر

تمشيت بروحي بالحوش

مو خبركم ينيه ما أخاف

حبيت ارتعاش جسمي من البرد اللي ما نحصله إلا شهر بالسنة

دخلت اتسبح والبخار يتصاعد والدنيا وناسه

ما اسمع الا صوت طقة لحم !!!!

تبون تعرفون شنو يعني

طقوا بايدكم اليمين على إيدكم الثانية

يعني صوت لا يمكن أتجاهله

اخترعت جد اخترعت

أبطل عيني ولا ذاك البريعصي الأبيض الفسفوري

ما شفت مثله أبد

وهو طايح على المغسلة

جان يلف ويخزني

جان اصرخ

يمااااااااااااااااااااااااااااا

ولا ينقز ويطيح ببطن المغسلة

وانا اصرخ وااااااااااااااااااااااااااااااا

ينقز مره ثانيه على ملابسي اللي كنت لابستها

اصرخ آآآآآآآآآآآآآآآآآآآآآآآآآآآآآآآآآآآآ

ينقز على فوطتي

تقولون كنغر مو بريعصي

أول مره أدري انهم يناقزون

حسبي الله عليهم من حيوانات

أبي أنحاش أروح يم الباب

ولا الحقير يركض على المغسلة

خرعني وقفلي قلبي وتفكيري

جان أزلق وأطيح ذيج الطيحه

اللي طرت طرت طـــــــــرت وهبدت على الارض

طبعاً حسبي الله عليه وقف يطالع ولا همه

وآنا أبجي وأصرخ من العوار

تصدقون ما قدرت أوقف رحت يم الباب

وفتحته شويه ولا يلفحني هوا مثلج

طبعاً الحين مو مثل قبل شوي

الهوا لا حلو ولا رومانسي ولا طل

قمت أصرخ بعلو حسي

ماماااااااااااااااااااااااااااااااااااااااااا

نونييييييييييييييييييييييييييييييي

مايااااااااااااااااااااااااااااااااااااااااام

تعالوااااااااااااااااااااااااا

رويناااااااااااااااااااااااااااااااااااااااااااا

ماماااااااااااااااااااااااااااااااااااااااااااااااااااااااااااااااااااااااااااااااا

وابجي وابجي بغيت اموت من القهر

قعد يخزني وانا بقمة الاذلال

واهو واقف على فوطتي

جنه يقولي شفتي انا شنو قوتي ماني هين

ترجيني ترجيني

حسبي الله عليه

الله ياخذك

عساك تموت

لو أحد غيري جان رباك

بس صج اليني ما يطلع إلا للي يخاف منه

عاد آنا أعترف فيني فوبيا حشرات

يعني ما أخاف منه

بس تلوع جبدي أشيل شي وأطقه

IT ISN'T WORTH THE MESS

الله وكيلكم ظليت على هالحالة مو أقل من نص ساعه

ماني قادره اوقف

ولاني قادره اطلع

ومجابلني شين الحلايا

يالزين تقولين البريعصية ينانوه؟

بعد هذا انا اقول أباليس وترى قاعده اسمعكم تضحكون

اخر شي امي حبيبتي سمعتني وقامت

نزلت تدورني شافت باب الصالة مشرع

طلعت بره لقتني بموت بجي

ترى والله الأمر مو هين بلا ضحك لا أعصب

يابتلي فوطه غسلت وطلعت والحقير يخز

طبعاً شالوني اهي والخدامة ما قدرت امشي

امي اخترعت تقول اظافري وشفايفي زرق

أكيد يعني بجي وطيحة وبرد قهر وكل شي

تبون تعرفون شنو صار تالي؟؟

طبعاً اسبوع وانا فلوووو قوية

وكحتي تقعد عيال شرق كلهم

والتهاب بالرئة وما تحركت من الفراش

وان قمت بمشي ما اقدر افرد ظهري

لما رحت الطبيب سوولي إم ار آي

قاللي الدكتور اني صار عندي بداية دسكين

بمكانين بظهري من الطيحة

كل هذا وتبوني ما أكرههم؟؟

ملاحظه: لما امي خذتني مع الخدامة

تقولي انتي تقولين يما كله من البريعصي على المغسلة

واحنا مانشوف شي

!!!!!!!!!!!!

بالله شتقولون آنا شايفته وربي

وأمي تقول ماكو شي

والخدامة تقول إنتي قول هناااااك

وآنا يشوف مغسلة ماكو شي

يعني شلووووووووووووون

مينونه ولا يتهيألي ولا حلم ولا شنو

ولا صج كان يني؟؟؟

يمااااااااااااااااااااااا

أصلا بس اتذكر اخترع

بعد دروس اللياقة النفسية لبوستات الغالي بولطيف لازم ما أسب

بس ما أقدر أتذكر البريعصي واسكت

أدري مواضيعي مو مالت عيد

لووووووووووووول

بس العيد من زمااااااان نسيناه

العيد صار عطلة وبس على قولة رؤية وطن

دامنا ما نفصل دشاديش

ماكو أكشن

وشي اسمه فرارة على بدلة عيد ما يدور عندي

أوكي عشان يمعة الأهل ألبس شي يديد شاريته من شهرين

إييييييييييييييييه يا العيد بس لا تخلص الإجازة وانا استانس

هذا احساسي بالعيد

اليوْم زُهـورُ الـرَّوْضِ تـغَـنّـت

بِحبـّاتِ العـقيـقِ عَلى جـيـدي

وكأنَّ زُرقةُ السّــمـاءِ تـجـلّـت

تُـقـبّـلُـني عَلَى نَـبْضَ وَريـدِي

وإِن نَـبَـضــات قـلْـبِي تمـنَّت

أَن يَـسْـمعَ الطـَّودُ لها غَـريد

فـما كُـنْت وَما قِـيـل تـهَـنَّت

إلا بِـسحر عَـيـنيـك عِـيـدي

زووزا

عيدكم مبارك

كل عام وانتوا بألف خير

وعساكم من عواده