Monday, March 23, 2009

عمليتها اليوم 11 بتوقيت الكويت




وانا بعيده عنكم



وعن ترابك يا وطن
.
.

ماظنتي بصوت بهالانتخابات

.

بس أنيويز

.

هنيالكم بمرشحين الغفلة

.

جان اللي سمعت عنهم بينزلون

.






شقول

اقول مشكورين؟

راح احس انها مجامله
.

ومابي أجامل لأن اللي بقوله من قلبي

.
وربي اجريتوا دموعي

وحسستوني بخير قلوبكم

عسى ربي يآجركم من فضله
.


كل ما كنت أحس بالضعف كنت أقرا ايميلاتكم وكومنتاتكم


بس سامحوني عالتأخير

كنت فل تايم

عناية بالوالدة ومواعيد

وسمعي يا نوني طبخت

وغسلت ونظفت

ما خلت شي اللي يسمونها برنسس

.


.


.


.
وكل شي قليل بحقج يا يما

اللي يعرفها يدري شكثر تعبت لنا

ما تهنت بسنين شبابها عشانا

عسى الله يقدرني واخدمج لي اخر يوم بعمري

على فكره

الوالدة ترى ما تدري عن مرضها

تدري ان يايه تشيل ورم حميد

ما تتحمل تدري مع الضغط والسكر

تدرون .. قبل شوي قايسينهم

السكر 14.7

الضغط 205 / 110

اول مره ادري انه ممكن يوصل جذي

اخييه يا يما ياريت بيدي اسوي شي

العجز عن اني اساعد اللي احبه يقتلني

بس بحيل الله بظل على قوتي وابتسامتي

.

.

.

.

.

.

.
وحشتوني وايد

قريت معظم كومنتاتكم وايميلاتكم للوالدة

حدها استانست

وتعلق بعد

قلتلها يما طيبي وافتحلج جيميل وبلوق بعد

واسميه مورد الخدين

تستحي ههههه

امي تخاف من الابر والمستشفيات

وتوها تقول شلون بيشق بطني واحد ما يسمي قبلها

قلتلها يما شنو ذبيحه عالجبله

تقول ذابحتني ام الانجليز
.

اللي اهي انا طبعاً

.
:")
.
.

.

.

.
راح أحاول أبلغكم باللي يصير كثر ما اقدر


اللي أعرفه انها راح تطلع من العمليات


على العناية المركزة


لانها يعتبرونها ميجور اوبريشن


وبتظل هناك يومين


ربج كريم يا زووزا


.

.

.

سامحوني اذا البوست افكاري فيه ملخبطه

.

مو نايمه من يوم ونص

.

وسهرانه على أمي

.

جم ساعه ويدخلونها العمليات

.

.


وما راح انسى


زيون .. انتي من ذهب


ايميلج وزعته على كل خواتي واخواني


مو ايميلج ايميلج


الايميل اللي دزيتيه



.


إلهي شاف أمي وعافها


وردها لأهلها سالمة غانمة


وشاف جميع المرضى


ورد كل غريب إلى وطنه

وأسبغ على قلبي من جبروت عزتك

نوراً وقوةً تشدد أزري بها
.
.


وصل اللهم على محمد خير البشر

وآله الأطهار

وصحبه الأبرار
.

.

.

إلهي انقطع الرجاء إلا منك


يا الله


يا الله


يا الله



85 comments:

الزين said...

ربي يمسح على قلبج

ويثبتج

ويقويج

ويرفع عنها ويشافيها وياجرها


زووز حبيبتي ما ضاجت الا عشان تتسع

توكلي على الله وان شاء الله مالها الا العافية

:**

الأستاذ حمام said...

الله يشفيها ويطمن قلبج عليها.. الله الله بالدعاء والتفاؤل

وطمنينا..

esTeKaNa said...

أسأل الله العظيك رب العرش الكريم ان يشفيها ويحفظها ويثبتها يارب
.....
الغاليه زوز
يا كبر مكانج
!!
فقدناج وايد من غير شر
وكلنا قلوبنا معاج
تدعي لج وتحبج وتتحرا أخبارج
تدرين؟
البارحة اقرا بهالبلوقات واقول ياربي الواحد شنو يبي غير الذكرى الحلوة والناس اللي تحبه؟
الكل يحبج
!!
هذي اجمل واكبر نعمة
وسعي صدرج وكوني قويه مبتسمه ومتفائله مثل ما نعرفج وان شاء الله أزمه وتعدي وعسى ربي لا يطول شدة وباجر تصير سوالف تسولفينها حق عيالج اللي بيبرون فيج وفيها
:***
طمنينا عليها
وسلمي عليها سلام جثيييير
وحبي لي راسها الغالية
وكل ما حسيتي بخوف ولا ضيقه مسحي على قلبج وادعي وقولي بقيين كامل:
حسبي الله لا إله الا هو عليه توكلت وهو رب العرش العظيم
!!
وادعي الرحمن
فأمره سبحانه كن فيكون وهو قادر على كل شئ لا يعجزه مرض ولا ورم ولا شئ سبحانه
.......

Blog 3amty said...

بيدج تسوين الكثير :)

الدعاء فكل شيء بيد ربج



يا عسى ربي يصبرها ويصبركم ويشفيها ويعافيها ويلبسها ثوب الصحة وتقر عين محبينها يا رب

الدســتور said...

الله يشافيها
وترجعون سالمين غانمين لديرتكم الكويت
و الغربة فرصة طيبة لتردين شوية من جمايلها

حاطب ليل said...

اجر اجر انشاءلله
طهورا باذن الله

كبرياء وردة said...

زوووووز

ولهت عليج وعلى سوالفج وربي

يا رب تشافيها بشفائك يا الله
ان شاء الله الفرج قريب
وتردون لنا بالسلامة وتنورون ديرتكم وتقر عيونا فيكم

بوسيلي راس امج
وطمنينا عقب

vancouver said...

اميييييييييييييييييييييييين

الله يسمع مننننننننج

ويطمن قلبج


ويشفي الوالده امييييييين


بعد قلبي
لما الحين ماقلتولها
?
اصصصصصصصعب شيء
انكم ترسمون ابتسااااااامه على ويوهكم وانتوا قلوبكم شايله كل الهم
يا الله

!!



الله يصبركم ويقوييييييكم


ويقومها من العمليه بالسلااااااامة

:*****

بس said...

امين يارب العالمين

اسال الله العظيم رب العرش العظيم يشافيها و يردها لأهلها سالمة غانمة
باذن الله

و عليج بالدعاء الدعاء يرد القضاء
بس اجتهدوا بالدعاء و رب البيت كريم

:)

ياالله يارب العالمين

عثماني said...

الله يشفيها و يقومها بالسلامة

و تقر عيونكم و عيونا برجعتها بالسلامة

:)

أنا كويتي said...

بسم الله الرحمن الرحيم

أمن يجيب المضطر إذا دعاه ويكشف السوء


دعاء وإبتسامة أمل والتوكل على الله

والله ما يسوي إلا الزين

أجر وعافية وقلوبنا معاها

chandal/danchal!! said...

الله يشافيها ويعافيها ويقومها بالسلامة... ويخليها لكم


سلامتها جدامها انشاءالله وأجر وعافية

الله يعطيكم على قد نيتكم اللي مافي اصفى منها... ويجعل كل اموركم خير


طمنينا عنها يا زووز


والله في بالي على طول... بس ما حبيت
اثقل عليج بالكومنت

في حفظ الله ورعايته

why me said...

الله يشافيها ويعافيها


زووووز



خلج ايمانج كبير حبيبتي انتي


لج وحشه

لج وحشه بعد عمري


بوسيلي راس الوالده

هذي امانه


:***

TruTh said...
This comment has been removed by the author.
TruTh said...

عسى الله يثبتج و يقويج و يلهمج الصبر

انتي قاعدة تحصلين أجر عظيم عند رب العالمين و منزلة عظيمة عنده لأنج قاعدة تبارين أمج اللي اهيا الجنة تحت أقدامها

عسى الله ينجّح عمليتها و يقومها بالسلامة و يشافيها و يعافيها و يكتب لها العمر المديد بحيل اللي عينه ما تنام

بوسيلي راسها و سلمي عليها واااااااايد

و طمنينا عليها بعد العملية

عسى الله يفرّحنا بردتكم بالسلامة قريب سالمين غانمين بإذن واحد أحد
:****

Anonymous said...

عندج رقمي وايميلي

ضروري انتظر منك تطمين

يارب انك تعافيها وتعفو عنا

صلاح الأنصاري said...

اللهم لا سهلا الا ما جعلته سهلا
وانت اذا شئت جعل الحزن سهلا

اللهم شافها انت الشافي شفاء لا يغادر سقما
نسأل الله العظيم رب العرش العظيم ان يشفيها

الله يسهل عليها يا رب ويهوّن العملية ويقومها بالسلامة
ويردها بالصحة والعافية

اللهم آمين
وانتي بعد حطي بالج على نفسج وصحتج
وصحيح ان جزا الوالدين لا يمكن نوفيهم حقهم فيه ولكن هم انتبهي لنفسج وانا اخوج

علي said...

اللهم بحق الزهراء وأبيها وبعلها وبنيها وبالسر المستودع فيها أسألك أن تصلي على محمد وآل محمد وأن تعافي وتشافي من طلب لها الدعاء ولجميع المؤمنين والمؤمنات.
ولا تخافي ولا تحزني إن الله معكم :)

mellow said...

الله يقومها بالسلامة إن شاء الله و كله أجر و عافية بإذن الله

قلوبنا معاج و معاها

الحـِمل كبير عليج بس تماسكي ، أهمه ربونا علشان نقوم فيهم

إن شاء الله ياربي يكتب لها الشفاء العاجل و تقومين فيها و تقوم فيج بالأفراح

سرحان said...

إن شالله تقوم بالسلامة و انا بحجز لها دومين

مورد الخدين دوت كم :)

حسافتج يا كويت said...

ربي يسمح امورها يا رب
وشافيها وعافيها وترد بيتها وهي شمعة عساها ما تنطفي يا رب

اللهم سهل عليها وشافها يا رحييييييييييم

Purplecious said...

الساعه الحين 11:13 بتوقيت الكويت

يعني الوالده توها داشه

يبيلها وقت على ما يبنجونها و يجهزونها

وكلي امرج لله

الله كريم و رحيم

لا تحاتين اذا تأخرت العملية ترى العمليات الكبيره تاخذ وقت وايد

الله يكون بالعون

و ان شاءالله تطلع بالسلامه

و تبشرينا

ما عليها الا العافية

:**

Mohammad Al-Yousifi said...

الله كريم انشاءالله

و تخلص العملية و كل شي يرجع زي زمان

الانسان ما يعرف قوته و مدى قدرته على التحمل الا في اوقات الشدة

موفقين و بالسلامة انشاءالله

:)

Safeed said...

( يختص برحمته من يشاء والله ذو الفضل العظيم ) .. أسأل الله العلي العظيم بحق محمد و آله الطاهرين أن يسبغ عليكم من رحمته و سكينته و يثبت قلوبكم ، و يبغلكم مرادكم

و أن يجعل في هذا الأمر شفاءً و تطهيرًا و غفرانا لكم و للوالدة عافاها الله

في الرواية "قال رسول الله صلى الله عليه و آله : قال الله عز وجل :إذا وجهت إلى عبد من عبيدي مصيبة في بدنه أو ماله أو ولده ثم استقبل ذلك بصبر جميل، استحييت منه يوم القيامة أن انصب له ميزانا أو أنشر له ديوانا".

==============

وكم يُسر أتى بعد عسر ففرج كربة القلب الشجيّ
وكم أمر تساءُ به صباحاً وتأتيك المسرة بالعشي
إذا ضاقت بك الاحوال يوماً فثق بالفرد الواحد العليّ
توسل بالنبي فكل خطب يهون إذا توسل بالنبي
ولا تجزع إذا ما ناب خطب فكم لله من لطف خفيّ
وبالمولى العليّ ابي تراب وبالنور البهيّ الفاطمي
وبالأطهار أهل الذكر حقاً سلالة احمد ولد الوصي

@alhaidar said...

آمين يا رب العالمين ..

الله يشفيها ويقر عين الكويت برجعتكم سالمين ..

وانشالله نسمع منج دايما أخبار طيبة ..

الله وقلوبنا معاكم أخيتي ..

I7na 3shagnaha said...

اللهم لا سهل إلا ما جعلته سهلا

و انت تجعل الحزن إن شئت سهلا

صبا said...
This comment has been removed by the author.
صبا said...

الله يشافيها ويطمن قلوبكم عليها

وياجرها

قلبي معاج يا زووز

وسلامي وقبلاتي للوالده

وطمنينه عليها عقب العمليه

انشالله تكون بخير

وتنتهي الازمه

والشفا انشالله بايد رب العالمين

ودعواتنا لها دايما بالصحه والعافيه

زووز لج وحشه

:*****

maha said...

عسى ربي يباركلج فيها ويقر عينج اللهم آمين
استودعيها الرحمن هو ارحم بها منا

Kuwait said...

بعد قلبي ربي يسهل العمليـه عليها ..
ويقومها بالسلامه ويردكم لنا بأقرب وقت :***
بليزززززززززززززززززززززززز
طمنينااااااااااا اول بأول

المقوع الشرقي said...

أسأل الله العظيم أن يشفيها
وانشالله سلامه تامه
آآمين
أذا طلعت بالسلامه00وتطمنتو عليها
بوسيلى راسها00قوليلها من ابنيه منطقتكم00عسى الله يرزقها الصحه والعافيه ويعطيج وياها القوه والثبات-
وطمنينا عليكم
لج فريه يا ام الزووز

joe said...

ماتشوفون شر
الصراحه ذكرتيني بيدتي الله يرحمها توفت و ماتدري انه فيها كل هالامراض و قبل لاتتوفه فتحو لها فتحه بريلها جان تفشل العمليه وتوفه وخلوها وماصكروا الجرح

الهم شافي وعافي كل مريض يالله و الله يصبركم

أبو جيج يدور نعاله said...

الله يشافيها و يقومها بالسلامة إن شاء الله


و أهم شى المتابعة بعد العملية ...خلج قوية جذيه ..العامل النفسى وايد مهم و إللى قاعدة إتسوينه صح

Anonymous said...

حبيبة قلبي
زوووووز
يالغاااالية
وربي قلوبنا معاج
تدعيلكم دايما
مابعد هالضيق
الا فرج وراحة
وربي مايضيع عبده
بتردون لنا باذن الله
سالمين غانمين
:*
ربي يحفظكم
ويطمن قلوبكم
وكل شي بأجره بعد قلبي
:**

Anonymous said...

أسأل الله العظيم رب العرش العظيم أن يشفيك

طهور بأذن الله

مركبنا said...

زرزو


اخنقتني العبره وانا اقرى بوستج

الله يخليج حق امج ويخلها لج

ويهون عليها
وتطلع لكم بالسلامه

Eng_Q8 said...

الله يشافيها انشالله ويطول بعمرها

Anonymous said...

عسى ربي يشفي الوالدة ان شالله و يشفيها و يخليها لكم ويصبركم ياااارب
والله ياجرج ان شالله ويحعله بميزان حسناتح وتشوفين هالخير بدنيتج وباخرتج يارب

ربي يشفيها وياجرها يارب ...

الله يصبركم وينزل السكينة على قلوبكم ..

Q8EL5AIR said...

خلوا ايمانكم بالله قوي .. والي فيه الخير الله بيجيبه ان شاء الله ..

دايما خلوا ذكر الله على إلسانكم ..


وعسى الله يشافيها .. ويبلغكم فيها بكل فرح ان شاء الله :)

قلوبنه ودعاءنه كله وياكم :)



وتحياتي ..
ويسلموااااااااااااااااااا :)

هذيان said...

انشالله تطمنون عليها

يا رب يشافيها ويعافيها

nikon 8 said...

الله يشافيها ويعافيها
ويعطيج الصحة والعافية لرعاية الوالده
وكله بأجره

Hashemy said...

الله يشفيها لكم انشالله وتقوم بالسلامه
تروحون وتردون بالف سلامه

ولا تتحسفين عالانتخابات وايد شكله كل سنه اكو انتخابات :)

فريج سعود said...

اشعلييج قاعد تاخذين اجر 24 ساعة

الله يشافيها ويردها سالمة غانمة

وان شاء الله ماكو الا العافية

Joonna said...

أسأل الله العظيك رب العرش الكريم ان يشفيها ويحفظها ويثبتها يارب
كلنا انحبج وولهانين عليج و ان شاء الله بترد و كلنا بنساعد انسويلها مدونه حلوه و هذا كله راح اتقطينه ورا ظهرج و ان شاء الله اتشوفين كل خير

ANGEL HEART said...

الله يشفيهااا ويخليها لكم ياارب
الف لاباس عليهاا

Fahad Al Askr said...

الله يكون بعونكم ويقومها بالسلامة

صديقيني يا عقر

قلوبنا كلها معاج

طمنينا

شقران said...

الغالية زووز

قلوبنا معكم ودعاؤنا لها بالشفاء

ربي يقومها بالسلامة

اللهم آمين


وكثرّوا من الدعاء وقراءة القرآن الكريم


مع أطيب الأماني والتمنيات

bakah said...

اختي الفاضلة زووز ..
والله اننا تضايقنا لمرض والدتكم كأنها احد افراد العائلة ..
نتمنى ان تتكلل العملية بالنجاح , وتعود لممارسة حياتها طبيعيا ..
قلوبنا معكم ..

حسام بن ضرار said...

اسأل الله العظيم رب العرش العظيم ان يشفيها و يعافيها و يقومها سالمه غانمه بحوله و قوته و ما ذلك على الله بعزيز

Unknown said...

ماتشوف شر حلوة اللبن ويجعله في ميزان أعمالها ولج الأجر على عنايتج بالوالدة

خارج الموضوع

بعد انتهاء العملية تخيلت خروج الطبيب المعالج من غرفة العمليات وملابسه ملطخة بالدم وجبينه يتصبب عرقا . يقف مذهولا وهو يقول عبارته المشهورة اللي دايما نسمعها بالأفلام المصرية : أحنا عملنا اللي علينا يا بنتي والبائي على ربنا

: )

Dr. Ali Maarafi said...

الله يشافيها و يعافيها
و يردها بالسلامة بحق محمد و ال محمد

الخيلاء said...

ان شاء الله طلعتها من العمليه
طلعتها من الشر و المرض

الله يفرحج بسلامتها واتكون سلامه دايمه تسر خاطرج

طمنينا عنج

والله يعينج على برها
ويجعله بميزان حسناتج

Kuwait said...

زووووووووووووووووووووووز
طمنينااااااااااااااااااااا بليزززززززز
ترى هذي امنا مو بس امج بروحج
الله لا يطول شده وعنده سعه
الله يشافيها ..
اسال الله العظيم رب العرش العظيم ان يشفيها

Bella said...

زووووووز .. عقب اللي قريته
بجيتي قلبي قبل عيني

الحمدلله على سلامتهااا .. تطمنا عليها من نوني وان شاء الله تقوم بالسلامه

زوووز .. الله يعطيج ان شاء الله على قد نيتج

حبيبتي خالتي اول ما شفت صورتهااا .. أخ يا زوزو بوسيلي ياهاااااااا تكفين

وزرة الخدين .. ام مو نفس الامهات
قلبها الصافي .. وروحها الحلوة .. ابتسامتها البريئة ..ودعواتها والذكر اللي على لسانها ماش اءا الله عليهااا

الله تقبل مناااا الحمدلله .. ما اوصيج زووزوو بالصدقات

ويا حياتي .. غسلي وطبخي ونظفي شنو يعني عادي

حبيبتي .. الظروف اللي عندج على صعوبتهااا بس ادري انج قويه .. ذكري الله دايمااا وان شاء الله بتلقون خير


ادري قرقت وااايد .. بس ولهت عليج
وان اشاء الله نشوفكم قريب ومن غير شر

Anonymous said...

وخيتي
ربي يشافيها
ويرجعها سالمة غانمة
طمنينا عليها

تدرين
عقب اسبوعين بلحقج
وخيتج نفس الحالة

صبا said...

زووووووز

طمنينيا على الوالده الله يخليج
انشالله صحتها تماما
شخبارها عقب العمليه
يارب يارب يارب
الله يشفيها ويعافيه
الله يكون بعونج
شدي حيلج ..معاها
ماجوره يارب
:**

Manal said...

حبيبتي زوز
هالام الحنون الطيبة الكل يدعيلها

نزلتي دموعي على خدي
ياريتني يمج
ويمها
الغاليين على القلب

انتي قوية

وبتكونين دوم قوية

:)

Dasmawee said...

بسم الله الرحمن الرحيم، بسم الله دواء، والحمد لله شفاء ، ولا إله إلا الله كفاء ، هو الشافي شفاء ، وهو الكافي كفاء ، اذهب البأس بربّ الناس شفاء لا يغادره سقم وصلى الله على محمد وآله النجباء

و طمنينا

Mr. Solutions said...

الله يقومها بالسلامة انشالله أجر و عافية

Anonymous said...

المباركية



اسمحلي
انت صج ما عندك دم
!!!!
انا شفت اوادم ماكو احساس
بس مثلك ما شفت
البنيه تقولك امها
داخله عمليه
!!!
يا تدعيلها يا تسكت
!

-mate said...

الله يقومها بالسلامة ويقر أعينكم بعودتها سالمة غانمة

وبارك الله فيج على مجهودج وتعبك وسهرك على راحة الوالدة. هذا إن دل فإنما يدل على برك لوالدتك

الله يقر أعينكم بردة الوالدة سالمة غانمة ويشفيها من علتها

`~MnO YeNSa! ~` said...

انا من امس احاتي مالي قلب
اكتب .. زووز
يمكن انا مو وايد
معاج ..بس يشهد الله انج عزيزة على قلبي و و معزة امج من معزتج
يا الغالية ...
و الله يقومها بالسلامة
و يطمكم عليها
هذا امتحان من رب العالمين
و كل ضيقة ..وراها فرج


ادري انج وايد مشغوله وحبيبتي معذورة ماحد يطلع من يزى
الام
زووز :*
عفية ناطرة تطمنينا
و اذا تبين اي شي انا موجودة
كلنا خواتج

iDip said...

الله يقومها بالسلامة

Don Juan said...

يالله انت تشافي ام زوز بحق كل ذي حق عندك

عسى الله يقومها بالسلامة و ترد لاهلها و ناسها و حبايبها :)

Anonymous said...

الله يشافيها إن شاءالله وتردون بالسلامة

ديري بالج عليها

منطلقة بطموحي said...

الله يحفظها و يقومها بالسلامة يا رب
كثر ما تقدرين ادعي
لا تيأسين
خصوصا في الثلث الاخير من الليل
و الله يستجيب دعواتج
و دعواتنا للوالدة
طمنينا عليها

Salah said...

الله يقومها بالسلامة

وطمنينا

لا تخلينا نحاتي!

kuwaitawy said...

الله يشافيها


المهم مو تنقطعين مره وحده


واصلينا من فترة لي فترة



عشان نتطمن بس


وصدقيني اللي قاعد يصير هذا مو مجامله يا زوووز



احلا شي بالتدوين ان اللي فيه عبارة عن عائلة كاملة

سواء اتفقوا او اختلفوا



وانشاءلله ترجعين بالسلامه انتي وامج باقرب وقت ممكن

lwatan-ajmal said...

الله يقومها بالسلامه بحق محمد وآله الأطهار

mtfa2el said...

الله يقومها بالسلامة متشافية متعافية

طمنينا عليها و عليكم

DiLLi O MiLLi said...

االلهم آآآآآميييين
الله يشافيها ويقومها بالسلامة
ويسر ناظرج

صــج فاقدينج حبيبتي
:**

أمانة أتطمنينا على الوالدة بعد العملية
الله يحفظها يااااارب

اجار الدين كشمش said...

اللهم اشفي والدة زميلتنا

بعز مقدرتك وجلالك يا ذالجلال والاكرام

اللهم انها من عبادك الدائمون

اللهم امييييين

فمالله

EXzombie said...

الله يقومها بالسلامة

طمنينا عليها

someone_q8 said...

السلام عليكم
ان شاء الله ماكو الا الخير اختي الكريمة
والتعب اللي انتي اتعانين منه كله مايضيع عند الله وهذا حق

بشرينا عن الوالدة والله يحفظها من كل شر

قلب طفله said...

ياربي يا كريم تشفيها و تعافيها
ياربي تسعد قلوبهم بسلامتها و شفاها
اسال الله العظيم رب العرش العظيم يشفيها

زووز ما عليها الا العافيه ان شاء الله
و كل اللي تمرين فيه ما يضيع عند ربج و بتشوفينه بدنياج سعاده و باخرتج راحه عسى الله يريح قلوبكم

طمنينا عليهااا و الله قلوبنا معاج
و ما انساكم بالدعاء
عسى الله يشفي كل مريض

:******

AuThoress said...

إلهي يحرسها لكم ويعافيها
كل الدعوات صادقة وحقيقية فلا تجزعي

~هند~ said...

أسأل الله العظيم رب العرش العظيم أن يشفيها ..


طمنينا ..

Hamad Alderbas said...

الله يخفف عنها ويقومها بالسلامة

المهم باشرينا بالاخبار وانشالله بتكون اخبار خير عن صحة الوالدة الله يحفظها

|:| DUBAI |:| said...

طمنينا عليها

!!

esTeKaNa said...

يا حبيبة قلب استكانة
اشلونج؟
واشلون الوالده؟
قلوبنا كلها معاج وتدعي لج
عسى ربي يحفظج ويصبرج ويمسح على قلبج
وأسأل الله العظيم رب العرش الكريم ان يشفيها شفاء لا يغادر سقما يارب العالمين


طمنينا اشلونها الحين؟
وشلونج انتي؟
!!

Lavender said...

ياعمـــــــــــــــــــــري

الله يقومها بالسلامه انشاالله

عسى الله يطول بعمرها و يحفظها لكم يارب
طمنينا عليها

lawyer said...

عسسسسسى الله يطمنج و يبرد قلبج و يفرحج بوالدتج انشاااااااء الله


يااااارب يسخرلها كل عبيده و كل خيييييير



عسى الله يردكم بالسلامه و يشفيييييكم و يطمنكم عليها عليها يارب






عسى الله يمسح على قلووبكم

خديجة البهاويد said...

اجر وعافية انشاء الله
اهم شي انج تسوينه الدعاء
الله سبحانه وتعالى مايرد دعاء اجتمعوا عليه مسلمين
حاولي تدعين كثر ماتقدرين وتطلبين من الناس الدعاء
هذا اقل شي ممكن نقدمه لانسانة رائعة مثلج

Sn3a said...

الحمدلله انج طمنتينا
وان شاءالله قريب تكتبيلنا ايميل ردتكم بالسلامه

زين سويتي ماقلتولها

ربي يشافيها ويعافيها ويخليها لكم ويطولكم بعمرها ان شاءالله

Ha22aaW said...

الحمدلله على سلامتها يا رب ..

دامج قاعدة تكتبين بوستات معناتها الحالة النفسية تمام ..
الله يقوم الوالدة بالسلامة يا رب
دعواتنا و قلوبنا معكم