Friday, February 20, 2009

ومَهْرُهَا سَيَكونُ الأبراجَ



في يوم من أيام الله .. بعد ما رديت من صلاة اليمعه
قعدت بحديقة بيتنا تحت شمس شتوية لذيذة أتقرا بكتابي
وامي حلوة اللبن مجابلتني مع قهوتها
آنا أقرا والغالية تعيش غرامياتها المعتادة مع حديقتها
وبنت جيرانا تطلطل علينا

فجأة تقولي يمه شفتي البامية؟؟

إي يمه عجيبة متى المرقة؟؟

وي يما خل تكبر انتي كله مستعيله؟؟
وآنا أقول بقلبي يما بس أخلص الصفحة فديت عيونج العنونة

أقرا أقرا تقولي
يما تصدقين ذاك اليوم ذقت الفلفل مو حار .. الظاهر أرضنا حلوه
أظن إشيرة الليمون الاخضر بتطلع ليمون حلو بعد ههههه

آنا وابتسامتي تارسه الويه قلتلها يما حلوة على راعيتها
تضحك بخجل بينما أسابق الحروف والكلمات لأنهي آخر جم سطر

تقاطع سباقي وتقول
وييييييييي يمااااااااااااا شوفيييييييي نص الليمون مقطع
هذا أكيد العصل حسون ولد أخوج شلّعهم يلعب فيهم اتيل
حسافه عليهم :(

يمه شدعوه عاد اتيل هالكبر؟!؟ @@

رديت أقرا آخر سطرين بقمة الاندماج
جاااااان تقووووووول بفرح
يمه شرايج أحط خط ورود من هني لي الدجه؟؟

آنا نزلت الكتاب لين بانت عنوني المبققة
يممممممممممممه وتاليتها وياج
لوما الجنه تحت ريولج جان لي تصرف ثاني معاج !!!!

هههههههههههه ما تيوزين .. بقوم أشوف الغدا
خلج انتي .. يا كتاب يا كمبيوتر

يمه حدج عاد لا تخيريني بينج وبين الغالي !!ء

المهم دشت الوالدة وهي تقهقه قلت أقرالي فصل يديد
وأعيش مع غبرة الحرب الضروس

ما أسمع إلا صوت دياي بوخلف

بقبقبقبااااااااااق بقيييييييييق بقااااااق

وليييييييييييييين آنا وين والقراية وين

ألتفت .. شفت منظر عجييييييب .. أوصفلكم اياه؟؟

سمعوا....






في حديقة منزلنا الخلفية
وقفت أراقب دجاجة
وهي تدعو لعقد جلسة
أيضاً ترأسها دجاجة
حضورها دجاجات
ونمل الأرض
وصبح أبى انبلاجه


يناقش فيها بنداً واحداً
أزمة مفتعلة
!!"دياية" أم "دياجه"


وقفت على المنصة أكثرهن بيضاً
وقالت
لننتخب من ليس بريشها انعواجا


أعطوها المطرقة

فمن أكثر منها رواجا؟


رقص الدجاج
تعالى الصياح
قالت إحداهن
لنهديها سراجا
عقبت أخرى
إلا إذا كان وهاجا






الديك كان يراقبهم معي
لهذا احمر عرفه انحراجا
وانتفخت أوداجه

صـــــــــــــــاح بهم: اعدلوا الجلسة

مـــــالـــــكم قلبتموها "حـــــراجـــا"؟


كان ليطلقهن جميعاً
ولكن عاد أدراجه!!ء





بانت بوادر حل
وغيهم قرب انفراجه
جال في ذهني سؤال




هل نويتن اندماجا؟
أم كالعادة تصريح
يعقبه تصريح
يدهشنا ازدواجا؟


خيبوا الآمال
غيهم أقوال
لا يرى منه أفعال
إلا ماهو حجةٌ وحاجة


أزعجنا النمل ضجةً
ودبيبهم أمال الأرض ارتجاجا
يدووروون .. يدووروون
لا يدرون .. من يتبعون
دجاجاً ينقر
أم طاووساً يسحر!!


بعد الهرج والمرج
لزمت الصمت
لبعض الوقت
وانتظرت الفرج







علم الديك لتجمعهن علاجه
خط مرسوم ديكياً
فبنى حولهن سياجا
ذبح منهن ذبحاً حلالاً
وضع بعضهن بالثلاجة

وصـــــــــــــــــــاح صـيــحة الفــجر


أن اصـمــــــــــــــــتن جميعاً


فالليلة عزمت من النعجة الزواج


ومهرها سيكون الأبراج



79 comments:

ZooZ "3grbgr" said...

اعذروني عالموديريشن

بس وايد دياي بالبوست

لووووووووويه

:")

Kuwait said...

لوووووووووووووووول ..
ماشاء الله لاعبه بالمفردات اللغويه لعـب عجييييييييييييب :)
حبيييييت البووست حدي ..
الله يعطي الوالده طولة العمر ويخليها لكم ..
وربي يعجل بحل أزمـة الدياي والـ"ديـاجـه " ;p

فريج سعود said...

جلسة ترئسها بوجود الديك دجاجة

قسما لاصنع منها غدا وجبة باجة







بعد قولي انتي الي مصورة الدياجة ؟

المتهـافت said...

الي ضحكني ان الليمون يلعبون فيه تيل
لووووووول

بعدين شدعوة محكمة دياي
:)
جميلة المدونة

ودمتم

كبرياء وردة said...

هههههههههههههههههه

زوز عليج خفة طينة وخيال خصب ما صاروا

البوست روووووووووووووووعة

تعيشين وتكرررين نفس الديباجة:P

luv u :)

Bloggerista said...

لوووول عسل يا زوووز


و حديقتكم بعد طالعة عسل عليج :**

الزين said...

ههههههههههههههه


انتي شي ثاني

وربي مامر علي وحده بفصاحتج

:*

ترى احنا حظيظين بوجودج بينا

والصور شي ثاني


واهم شي نعجة ومهرها الأبراج

:)

Anonymous said...

Animal Farm النسخة الكويتية من رواية

جميل البوست
:)

ساره النومس said...

حبيت امج والله الله يخليها لج


موضوعج لووووووول

Anonymous said...

العزيزة زوووز

مبدعة

ورائعة

كما عهدتك

دوماً

وصف

جميل

مبدع

احسنت يا قمر

دمت بخير وسلام

esTeKaNa said...

يا صباح الورد كله
يا صباح الابداع اللي يقطر
!!
وااي انتي زووووقه
حسيت عمري كاشخة وياكم انتي والوالده بالحديقة
عسى ربي يحفظها ويحفظج

اي هذي خف الطينه
شي موجود
فطري بزوز
ماهو شي مستحدث
:pP
وعجبتني سالفه الدياي
لوووول

مركبنا said...

لقد اضحتنا وجعلتي في انفسنا انفراجا

أخبار الاتحاد said...

شعر سياسي بليغ
كليلة ودمنة تنبعث من جديد

عبر التمثيل بالحيوانات الصامتة
والكناية عن الكائنات الناطقة

أو ربما هو غير ذلك
لكن اهتماماتي جرتي لهذا التفسير

ربما ... من يدري
فقديمًا قالوا المعنى في بطن الشاعر
وأظنهم يقصدون الدجاجة :)

Q8Sky said...

وشرسو عليه اخر شي ديايه ولا دياجه؟

Bella said...

wallah Bad3tay am reading o 7adei intersted fdaaaitech o fedait
5alteii qa3da at5ylkm lo0o0ol madreii laish :P

o 3ejbtnii salfat aldeej elli bya5eth na3ja lo0o0ol 9ej ench raw3a ana ashhad

any way Well Done & Grazie

Barrak said...

اعتقد ان كل دياي الكويت موجوده له صوره في هذا البوست


سيدتي الراقيه


اشكرك كل الشكر على تشرفي بوضع اعلان منك في مدونتك الراقيه عن ديواني الأول


فيج الخير

وراح اعذرك على الموديريشن

قانونى كويتي said...

الاخت العزيز زوووز


الله يخليلكم الوالدة العزيزة واتنور عليكم البيت دوم

وصراحة خليتينا نتحرك معاج بالحديقة مع الدياي

وقمت اطالع حوالينى قلت يا حلاتهم وينهم عنى


تحياتى

Mohammad Al-Yousifi said...

تصلين اليمعة بالمسجد

ماشاءالله

:)

darkness said...

او شي الحمد لله على السلامه

متى رديتي؟؟

منوره منوره

ثاني شي وحشتيني حدي مدي

ثالج شي

اوووف قويه

لووووووووووووووووووووول

Q8EL5AIR said...

عاشت الوالدة والله .. الله يطول بعمرها ان شاء الله :)استانست عليها :)


بعدين الله يهداج قراءة وجيرانكم بوخلف !!
وين بتقرين !!!

:):):)


شسم الكتاب !! :)




كفو والله على الديج .. كسر فيهم كلهم :)
يستاهلون !!



جدا جدا جدا اعجبتني السالفة :)



وتحياتي ..
ويسلموااااااااااااااااااا :)

why me said...

حلات الوالده والله

بوسيلي ياها

:)



==



خوش بوست والله

كله دياي

لووول

Salah said...

يا سلام يا شاعرتنا... صح السانج :)


الله يخلي الوالدة ويطول بعمره... ذكرتيني بأمي... بعد جبدي أمي...

Safeed said...

قضى الدجاج يوم فغر فاها
و امنت في عشها بما حواها
و لكن عند الديك كان رداها
فقوّض ركناها و ذلَّ صباها
هكذا .. مصير طوالِ الشفاها
الذين بالديك رفعوا الجباها
و أمنوا به رقيبا فمحاها
:)

خارج الموضوع الرائع :

فيديو جميل أنصح بمشاهدته :)

bakah said...

مهرها شركة الأبراج ؟ :)

شنو هالنعية الراقية :)

عموما لابد في النهاية من الإقرار بأن:

هازا ما خوش .. :)

Anonymous said...

ههههههههههههههههههههههههههههههه

"رادة من صلاة اليمعة؟"

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

كاريكاتير said...

مرحبا



ابداع

بقبق بقبق بقييييييييييييييييق

ZooZ "3grbgr" said...

كويت

الله يسمع منج يالغالية
وانا حبيتج
:**

ZooZ "3grbgr" said...

ولد روما

نو .. دياي بو خلف ما يركدون
وين أقدر أصورهم

وبعدين باجة دياي!!!
والله عجيبه

:")

ZooZ "3grbgr" said...

المتهافت

إي والله ما شفت حسون اسم الله عليه
حده عصصصصصصل ليش انه ما يقعد ماشاالله

عيونك أجمل
شكراً

ZooZ "3grbgr" said...

كبرياء وردة

بعد عمري انتي
ما تحسين من البوست ودج بجيكن فيليه
ههههه متوحشة زووز
:**

ZooZ "3grbgr" said...

فاشونيستا

والله انتي العسل
لا تشوفين أمي شكثر تحبها
ساعات أغار
أقولها آنا ولا الحديقة!!!
:**

ZooZ "3grbgr" said...

زيووون

اذا اتتك مذمتي من ناقص
فتلك الشهادة لي بأني كامل

وإذا ما الفصاحة لي أسهبت
في مدح لساني فما أنا فاعل


طبعاً الثاني بس لي!!
زيون مادري شقول

خدودي صاروا حمرررررر
هههههه

الله لا يحرمني منكم
:**

ZooZ "3grbgr" said...

اكشخ

هلا بطيارين المستقبل
بروح أقرا أنيمال فارم
مشكور

ZooZ "3grbgr" said...

طموحة مملوحه

ويخليلج أمج حبيبتي سارونه
عسى لووول يعني حلو عاجبج
:**

ZooZ "3grbgr" said...

منوري

يسلم قلبج ربي
ولا يحرمني منج ومن قربج
عندي احساس عندج شي بتقولينه
صح؟؟
:**

ZooZ "3grbgr" said...

استكانة

هلا بالغالية اللي بكنوز الدنيا
مالج شغل من بوست ولد روما
ولا يضيق خلقج

الاستكانات المضروبة شغل بوطقة اهي اللي ب50 فلس

انتي تتقدر قيمتج بقيمة اللحظات الحلوة اللي تعطينا اياها

جني طلعت عن الكومنت
بس مو مني
حبيت اوضح الصورة
:**

ZooZ "3grbgr" said...

مركبنا

بعد عمري والله
عسى الله يدسم عليج هالضحكة
ولا يحرمج من كل غالي
:**

ZooZ "3grbgr" said...

أخبار الاتحاد

قد فسرت ما كتبت بحق
وقد نطقت الدجاجات بما جرته لها خيالاتي

وكل ما كتبت كان بعد رؤيتهن متجمعات بشكل دائري يعلو صوتهن بما لا أفقه من نقنقه

بس صدقني
ما كانوا حيوانات صامته
الله ياهم مزعجين

:")

ZooZ "3grbgr" said...

سما الكويت

اهم لحقوا؟؟
من اللجة انتهوا خااااااالص

ZooZ "3grbgr" said...

أزوريااااااا

حبيبتي والله
عاد مكانج فاضي
تدرين أمي شكثر تحبج
good that u liked it hun
:**

ZooZ "3grbgr" said...

أبو البرك

هلا وغلا

تصدق إي صحيح
وايد صور دياي
بس أشوفهم أصير أبي جيكن فيليه

ولا تشكرني
هذا واجبنا
صرنا أهل

:")

ZooZ "3grbgr" said...

قانوني كويتي

ولا يحرمك من غالي يارب
خلاص .. راحت أيام الدياي بحديقتنا
بدوا دياي بوخلف ياكلون زرع أمي
فالاسبوع اللي فات ركبنا شبك عالحديقة
مو انت دريت الحين
زرع أمي خط أحمر

:")

ZooZ "3grbgr" said...

مطقوق

والله إذا قدرت وربي وفقني
صلاة المسيد غير
مع إن الخطيب ذابحني الله يهداه

ZooZ "3grbgr" said...

داركنس

انتي وينج
الله يسلمج
من زماااااااان رديت
تبيني أطق جرس
ههههههههههه
وانتي وحشتيني والله
:**

ZooZ "3grbgr" said...

كويت الخير

ولا يحرمك من غالي يارب
لو قعدت معاها أكيد بتستانس هليها أكثر

هههههههههههههههههه
والله ضحكتني
ياااااااازين بوخلف
ما تدري أهلي شكثر يحبونه

يوم ما زارونا أهل بيته
ضج الوالده نص الحجي ما فهمته
بس حبتهم حيل
وايد طيبين

الكتاب الله يسلمك
حرب في الصحراء
مذكرات غلوب باشا

وبعدين
من يقدر يقول للديج شي

ZooZ "3grbgr" said...

وايميه

حبيبتي وصللللللل
بستها وقلتلها من وايميه
هههههههههههه

سكتي
كنت بحط صوت دياي بالمدونة
بس قلت جنها مصخت زووز
لووووووول
:**

ZooZ "3grbgr" said...

صلاح

صح بدنك اخيي
ويطول عمر والدتك
ولا يحرمك منها ومن كل غالي يارب
:")

ZooZ "3grbgr" said...

سفيدان

عندما استلمت رسالة بتعليقك
سعدت كثيراً بأبياتك المحكمة
وفضلت أن أبقي الفيديو ليوم التعليق
لم أره إلا الآن وأنا أكتب ردي عليك
في البداية عجزت عن الرد
أنت الذي أحسست بفهمك العميق لما عنيت بين السطور
وردك فاق ما كتبت أنا
فقررت مشاهدة الفيديو الذي نصحت بمشاهدته
سفيدان
أقرحت قلبي
أكتب الآن والدمع لم يفارق عيناي
فهمت الرسالة
وأشكرك عليها
واعلم أنني أقرب المقربين لها
والتي تباهي اخوتي واخواتي برضاها علي
ولكن يا سفيد
شلون أقولك
دعني أتركها للبوست القادم
سيشرح ما أريد قوله
أشكرك أخي الغالي

ZooZ "3grbgr" said...

مطعم باجة

شركة الأبراج بكبرها الحين صارت على نص
الله يعينهم

بس أفا
زعلت والله انه ما عجبك
ممكن تعلمني ليش؟
عشان أكون بالبرواز
؟؟؟؟؟

ZooZ "3grbgr" said...

انونيمس بالعربي

يا هلا ويا مرحبا
متى نشوف مدونتك
وايد تعلق ماشاالله
وليلحين ما فتحت أكاونت
عالعموم
آنا جداَ سعيده اني قدرت افرحك
عساك دوم فرحان
بس تبي تضحك
تدري اني اروح مشي
لووووووووووول
انا كل ما افكر فيها استانس
مغامرات
صج بيتنا شارع عن المسيد
بس اهي فيها راحه نفس
بس الحين بالجو هذا
ولا بالصيف
ما اصدق متى اوصل
نورت
ولا تقاطع
:")

ZooZ "3grbgr" said...

كاريكاتير

هلا وغلا
من بعض ما عندكم أخيي
آثار الجيكن بانت
الله يستر
عاد انا مجهزه لقاح انفلونزا الطيور
JUST IN CASE
اسم الله عالجميع
نورت مبدعنا

Najmah said...

زوز يازوووز
مادري اقول الحين
مساء الجمال ولا صباحه
:))
انتي شي عجيييييب
تدرين شنو شوقتيني
على قعدة بالحديقة
وريحة ورد وليمون
وبايدنج كتاب
وحواليج صراخ هالدياي
وتحذفين كتابج
وتجابلينهم وتكتبين
شعر فيهم
ترى شعووووور
:))
خطيرة الصور

|:| DUBAI |:| said...

وااااااااااااااااي ما احبهم
مووولية
و كل ويكيند
عادي فاره عليهم شيء
مودرين حوي البيت كله
شكبره
ياين تحت دريشتي
يصيحون
ما احبهم
:(

enter-q8 said...

قوية يا زوز
ما اقدر اقول اكثر من جذي

esTeKaNa said...

يا بعد قلبي قلبج انتي
ربنا يجبر بخاطرك
:**
عاد ما شفتي ويهي كاااشخه
والضحكة شقاقيه
واضواء الشهره على ذيج الاستكانات المصفصفه
اخر شي خمسين فلس
!!
وشوفيني كل شوي مسيره عليه
اقرا التعليقات
كل ماحد قال استكانة:
قلت نعم
ياربي الواحد يفز قلبه
:Pp~

bakah said...

مرحبا زووز ..

ما قصدت الأبيات ..

الأبيات جميلة جدا ومعبرة ..

زواج الديج من النعية هازا ما خوش :) ..

بس طلعتي تزعلين بسرعة :) ..

why me said...

بعد عمري والله


جان حطيتي صوت الدياي

يطلع البوست حده
cool


loool

:***

صبا said...

من أروع ما كتبتي

:***

عسى الله يطول بعمر الوالده ويخليها لكم يارب
حدها رومانسيه تحب الطبيعه
مثلي
;)

وطلبتج الباميه
لا طرشين لي الباميه
طرشيلي مرق الباميه
:)
ما يحتاي ..والعنوان تعرفينه
صبا بلوق ...شارع الحب...ق 1

ورا فريجكم
:)

انما النص الثاني من البلوق
ابدااااع
سياسي
يحاكي الواقع
صافع الحجي صف
والمهر ... ناطحة سحااااب وانتي الصاجه
:***

TruTh said...

واااااااي أموت على الأمهات اللي كله على لسانهم كلمة يمة

أحسهم قمة في الحنان
^_^

الله يهنيج في أمج و حنانها و عسى الله يحفظها و يطول بعمرها يااااااااا رب

ومن قدهم الدياي قام ينكتب فيهم اشعار لوول

تسلم ايدج و يعطيج الف عافية
:)

Anonymous said...

زووز سجلت مدة أطول حق ياني

سمعيها:***

Sn3a said...

انتي احمد مطر
النسخه الكويتيه الناعمه

Ha22aaW said...

وقف الاستاذ بعد ان شرح القصيدة للطلاب و قال لهم

هكذا يا اعزائي كان رعيلنا الاول يتغنون بتراب الكويت و حملوا المشعل ليضيئوا سمائها فكتبوا لها و تحملوا من اجلها الكثير

هذه قصيدة ستدرس لاطفالنا مستقبلا .. قصيدة تكتب بماء العين

زووز

خلدت اسمك بهذه القصيدة

ملاحظة: لن اقبل بوست بمستوى اقل من هالبوست

Anonymous said...

عجيب أمر الدياي ... أقصد الدياج


همممم... ما أدري .. ضعت .. شنو خلصوا عليه

دياي ولا دياج؟؟

خوش بوست

والله يعطي الوالدة الصحة والعافية وطولة العمر ... ويهنيكم :)

Anonymous said...

سؤال ... شكلكم ما تشترون بيض من الجمعية صح؟؟


عاش بوخلف


باجر عندي عزيمة ... طرشوا لي دياي... أقصد دياج

أقصد ... ما أدري اللي هو المهم عندي عزيمة :)

زهرة الرمان said...

"
أم كالعادة تصريح
يعقبه تصريح
يدهشنا ازدواجا؟


خيبوا الآمال
غيهم أقوال
لا يرى منه أفعال
إلا ماهو حجةٌ وحاجة

"


وصف بليغ
للحالة السياسية اللي نعيشها

:)

"

.
.



على طاري الدياي أو الدجاج أو الدياج

لما كنت صغيره رحنا سوق الحمام أخوي الصغير يبي حمام


أنا شفت دجاج استرالي لونه عجبني


مع البجي والتزعل خذالي الوالد ثنتين مع ديك


في حديقة البيت حطيتهم وضبطت لهم بيت من الكراتين الفاضيه .. وبهدلو الحديقة

اسبوع بس وأمي ما تحملت و طرتهم من البيت :)


أخواني كل من نطبخ دجاج قالوا هذا دجاجك


وما آكل ..


و أمي تزف وتعصب ..



صارت تحطلي طبقي بروحي سمك أو لحم



.. ليما نسيت السلفه :)

علي said...

امممم الدياي عجبوني .. بس ضايقني المؤتمر اللي عقدوه لأن قراراته ماكانت تتلائم والمواقف العربية الصادمة .. او المتصادمة والمختلفة :(


يسلمو يالابدااااااااااع

يبي لينا نسوي تعاون في النقد الساخر

اقصوصه said...

ههههههههه

لا وايد قريتي عيل

حليلنا احنا عشاق القراءه

مب كافيه انا صرنا على وشك الانقراض

يحاربونا بعد في عقر دارنا

كان الله في العون :)

ANGEL HEART said...

ابداع ماشاءالله

يابختهم الدياي بهالشعر :)

عسى الله يخلي الوالده ويطول بعمرها ويخلي حديقتها عامره بصوتها ولمساتها

عاد تصدقين انا مثل اميمتج امووت عالحديقه والليمون والورد ومجابلهم يشرح الصدر

تحياتي لج :)

بو محمد said...

مكمن الإشكال في الديك
دمت و الأهل و الأحبة برعاية الله

Dr. Ali Maarafi said...

الديك و الدجاج مو صج
منظمين على الاقل احسن من 000 :-)

بوست جميل

ولد الديرة said...

استأذنتي من الخرافي

خبرج

كنتاكي

S-Q8 said...

nice post wallah:)
o mashalah awal wa7da asma3 minha inha ray7a 9alat el yem3a! doom inshaah

اجار الدين كشمش said...

عجبني جمال الديج
وشمووخه

وحمرة عرعوووره

بوستك فرايحي ...مايبي تعب وازعااااج

الله يزيد البوستات الفرايحيه
فمالله

White Wings said...

يا سلام
صح لسانك
رائعة بالفعل

@alhaidar said...

رائعة جدا .. أرى فيها اسقاطات عميقة ..

تبا لزمن الدجاج !!

Jobove - Reus said...

very good blog, congratulations
regard from Reus Catalonia
thank you

شقران said...

العزيزة زووز

مساء الانوار الجميلة يا بلجاء الحاجبين
:)

--------


أهم شيء إن والدتكم الكريمة دشت البيت وهي..تقهقه
:))

--------



آعجبتني جدا أسقاطات حكاية الدجاج والديك ذو الاوداج والادراج!؟



تقبلي مني أجمل تحايا المساء

فــــــرنـــــــاس said...

العزيزة زووز


منذ أيام وأنا في خارج الكويت، دعاني أحد الأصدقاء على العشاء في شقته. وخلال الحديث تطرقنا إلى المدونات والشباب والشابات الكويتيين وجهودهم ومواهبهم وربما أهوائهم. قال لي:

في وحدة حاطة مدونة اسمها عقر بقر، أول ما أبي أدش على المدونات أدش عليها أول

وعندما سألته عن السبب، أجاب:

لأنها حاطة على اليمين كل المدونات الكويتية، إلي معاها وإلي عليها، وكل شي جديد يطلع عندها أول. والبنية موهوبة تستاهل القراءة وما عليها زود


أما أنا، فقد ابتسمت، وأشرت برأسي بالموافقة، ورددت خلفه:

البنية موهوبة تستاهل القراءة وما عليها زود


شعر رائع يا عزيزتي


تحياتي الحارة
فرناس

charisma said...

هههههههه
زووقه امج
الله لا يخلييج
اثريهم كلهم نفس السلك هالامهات لوووووووووول اسم الله عليييهم الله يحفظهم قاعد اتذكر امى
:))

اما حوار الدياااى حكااايه
هههههههه ابدعتيييييييييي
وسعتى صدرى بهالليل
يا حلوج يا زووز
:*